ပြည်ထောင်စုဝန်ကြီး ဒေါက်တာ ချောချောစိန် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီးအား လက်ခံတွေ့ဆုံ

နေပြည်တော် ၂၀၂၆ မေ ၂၉

ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာချောချောစိန်သည် မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီး H.E. Ms. Ma Jia အား ယနေ့နံနက် ၁၀ နာရီတွင် နေပြည်တော် ပညာရေးဝန်ကြီးဌာန ရုံးအမှတ် (၁၃) ရှိ ဧည့်ခန်းမ၌ လက်ခံတွေ့ဆုံသည်။

တွေ့ဆုံစဉ် ပညာရေးတက္ကသိုလ်၊ ပညာရေးဒီဂရီကောလိပ်များမှ ကျောင်းသား ကျောင်းသူများနှင့် မဟာဘွဲ့တက်ရောက်ရန် အရည်အချင်းပြည့်မီသော ဆရာ ဆရာမများအား တရုတ်ပြည်သူ့သမ္မတ နိုင်ငံရှိ တက္ကသိုလ်များတွင် ဆရာအတတ်ပညာနှင့် စပ်လျဉ်းသည့် ဘာသာရပ်များ သင်ကြားနိုင်ရန် ပညာတော်သင်များစေလွှတ်နိုင်ရေး၊ နှစ်နိုင်ငံအကြား ပညာရေးကဏ္ဍ ပူးပေါင်းဆောင်ရွက်မှုဆိုင်ရာ ကိစ္စရပ်များ ပိုမိုမြှင့်တင်ရေးတို့ကို ရင်းနှီးပွင့်လင်းစွာ အမြင်ချင်းဖလှယ် ဆွေးနွေးကြကြောင်း သိရသည်။