ရန်ကုန် ၂၀၂၆ ဖေဖော်ဝါရီ ၂၀
ပညာရေး၀န်ကြီးဌာန ပြည်ထောင်စု၀န်ကြီး ဒေါက်တာချောချောစိန်သည် ဒုတိယ၀န်ကြီး ဒေါက်တာဇော်မြင့်၊ ဧရာ၀တီတိုင်းဒေသကြီး စီးပွားရေးရာ၀န်ကြီး၊ တာ၀န်ရှိသူများနှင့်အတူ ယနေ့နံနက်ပိုင်းတွင် ဧရာ၀တီတိုင်းဒေသကြီး ဟင်္သာတမြို့ ဟင်္သာတ တက္ကသိုလ်၌ ပါမောက္ခချုပ်၊ ဒုတိယပါမောက္ခချုပ်၊ ပါမောက္ခများ၊ ဆရာ ဆရာမများ၊ ဝန်ထမ်းများနှင့် တွေ့ဆုံသည်။
တွေ့ဆုံရာတွင် ပြည်ထောင်စု၀န်ကြီးက ဆရာ ဆရာမများသည် ပြောင်းလဲလာသည့် ခေတ်စနစ်နှင့်အညီ ကျောင်းသားအခြေပြု သင်ကြားနည်းစနစ်များကို အကောင်အထည်ဖော်ဆောင်ရွက်လျက်ရှိသည်ကိုတွေ့ရကြောင်း၊ သင်ကြားရေးသည် သုတေသနနှင့် ဆက်စပ်မှသာ သုတေသနစာတမ်းများရေးသားရာတွင် အဆင်ပြေချောမွေ့မည်ဖြစ်ကြောင်း၊ ဟင်္သာတ တက္ကသိုလ်တွင် ထူးခြားသည့်ဘာသာရပ်များအနေဖြင့် ငါးလုပ်ငန်းဘာသာရပ်နှင့် စိုက်ပျိုးရေး ဓာတုဗေဒဘာသာရပ်နှစ်ခုကိုတွေ့ရှိရကြောင်း၊ နိုင်ငံတော်အနေဖြင့်လည်း စိုက်ပျိုးရေးနှင့် မွေးမြူရေးကိုအဓိကအလေးပေးဆောင်ရွက်လျက်ရှိကြောင်း၊ ယင်းဘာသာရပ်များကို သင်ကြားသည့် ဆရာ ဆရာမများအနေဖြင့် သင်ကြားရေးနှင့် သုတေသနကို ချိတ်ဆက်ဆောင်ရွက်ရန် များစွာလိုအပ်ကြောင်း၊ ဆရာ ဆရာမများအနေဖြင့် သင်ကြားရေးတွင် AI နည်းပညာကို အသုံးချနိုင်ရန် လေ့လာထားကြစေလိုကြောင်း၊ မိမိတို့နိုင်ငံ၏အခြေအနေ၊ ကျောင်းသား ကျောင်းသူများ၏ လိုအပ်ချက်နှင့် ကိုက်ညီသော သင်ရိုးညွှန်းတမ်းများဖြစ်လာစေရန် အကျိုးရှိစွာ အသုံးပြုကြစေလိုကြောင်း၊ ကျောင်းသား ကျောင်းသူများအနေဖြင့် Project များအတွက် ခေါင်းစဉ်ရှာဖွေရာတွင် AI နည်းပညာကို စနစ်တကျ အသုံးချတတ်စေရန် လမ်းညွှန်ပေးစေလိုကြောင်း ပြောကြားသည်။
ထို့နောက် ဒုတိယ၀န်ကြီးက ၂၀၂၆-၂၀၂၇ ဘဏ္ဍာနှစ်တွင် ဟင်္သာတ တက္ကသိုလ်၏ လိုအပ်ချက်များအပေါ် ပံ့ပိုးဖြည့်ဆည်းဆောင်ရွက်ထားရှိမှုများကို ရှင်းလင်းပြောကြားသည်။
ယင်းနောက် ပါမောက္ခချုပ်က တက္ကသိုလ်ဘောလုံးကွင်း အဆင့်မြှင့်တင်နိုင်ရေးနှင့် စပ်လျဉ်း၍ ရှင်းလင်းတင်ပြပြီး တက်ရောက်လာကြသူများ၏ တင်ပြချက်များအပေါ် ပြည်ထောင်စုဝန်ကြီးက ပေါင်းစပ်ဖြည်းဆည်းဆောင်ရွက်ပေးသည်။
ဆက်လက်၍ ပြည်ထောင်စု၀န်ကြီး၊ ဒုတိယ၀န်ကြီးနှင့် တာ၀န်ရှိသူများသည် ဧရာ၀တီတိုင်းဒေသကြီး မြန်အောင်ခရိုင် ကနောင်မြို့ အခြေခံပညာအထက်တန်းကျောင်း၌ Grade-12 ကျောင်းသား ကျောင်းသူများနှင့် တွေ့ဆုံအားပေးစကားပြောကြားပြီး ကျောင်းအုပ်ကြီး၊ ဆရာ ဆရာမများ၊ မြို့မိမြို့ဖများ၊ ကျောင်းသားမိဘများနှင့် တွေ့ဆုံရာတွင် ကျောင်းသား ကျောင်းသူများ အဆင်ပြေချောမွေ့စွာ စာမေးပွဲဖြေဆိုနိုင်ရေး၊ Grade-12 အောင်ချက်ရာခိုင်နှုန်း မြင့်မားရေးအတွက် လာရောက်အားပေးခြင်းဖြစ်ကြောင်း၊ ကျောင်း၏လိုအပ်ချက်များကိုသိရှိပြီး အတတ်နိုင်ဆုံး ပံ့ပိုး ဖြည့်ဆည်းပေးသွားမည်ဖြစ်ကြောင်း ပြောကြားကာ ကျောင်းအတွက်ချီးမြှင့်ငွေများကို ကျောင်းအုပ်ကြီးထံ ပေးအပ်သည်။
ထို့နောက် မြန်အောင်မြို့ အမှတ်(၂) အခြေခံပညာ အထက်တန်းကျောင်းရှိ စာသင်ဆောင်များနှင့် ကျောင်း၀င်းအတွင်း ကြည့်ရှုစစ်ဆေးခဲ့ကြောင်း သိရသည်။